Seawifey

Doon the crags a gaan

aneath a peerie muin

a kirnt a puil o watter

an luikit richt doon.

Heivens swirlin aneath ma hawns

Stars dancin an echtsome reel,

Planets aw jeeglin aboot

An a lach tae masel.

Whit fun it wis tae hink

A quine like me

Mincin aboot wi the cosmos

dominie o’er awthin.

The wind skelps ma neb

An ma lugs are ringin wi the soond

O a thoosan waws a cawin

A luik up frae the graun.

Tae spy a licht an the easins

A buccar gey far awa

Wha kens whit thir up tae

Disnae fash me.

A cast ma thochts aside

An gaup a moothu o sautie air

Drap a silver frae ma poakit,

Fir the selkies, an a leave it richt there.

Noo ma time is up

An a scraffle ma wey back hame

Caw cannie alang the routherie stanes

An lowp o’er the yett.

Morn cam. Sunlicht oan ma wearit een

A mak ma piece an heid tae wirk

Naebidy kens whit a wis daein.

Last nicht, unner moonlicht

A hae ma ain wee yird,

wi naebody tae bather me.

A glamourie, lusum, saucht.

• Ingrid Hill All rights reserved 2026